canada-pmஉலகம் முழுவதும் உள்ள தமிழர்களுக்கு இன்ப அதிர்ச்சி அளிக்கும் வகையில், கனடா பிரதமர் ஜஸ்டின் ட்ருடே தமிழ்ப்புத்தாண்டு வாழ்த்து தெரிவித்துள்ளார்.

தமிழர்கள் அதிக அளவில் வசிக்கும் நாடுகளில் கனடாவும் ஒன்று. தமிழர்களின் வாழ்வியலோடு மிகவும் பின்னிப்பிணைந்த கனடா, தமிழர்களின் கலை, கலாசாரம் என அனைத்திற்கும் தகுந்த அங்கீகாரம், மரியாதை வழங்கிவருகிறது.

இந்நிலையில், சித்திரை 14ம் தேதியான இன்று தமிழ்ப் புத்தாண்டு தினம் என்பதால், கனடா பிரதமர் ட்ருடே தனது வாழ்த்துகளை தெரிவித்துள்ளார்.

இதுபற்றி டுவிட்டரில் அவர் வெளியிட்டுள்ள வாழ்த்துச் செய்தியில், ‘’உலகம் முழுவதிலும் உள்ள தமிழ் மக்களின் புத்தாண்டு தினத்தை வரவேற்கிறேன். இந்த புத்தாண்டில், குடும்பங்கள் மற்றும் நண்பர்கள் கூடி கொண்டாடுவதோடு மட்டுமின்றி, வரும் ஆண்டு தமிழர்களுக்கு சிறப்பாக அமைய கடவுள் வழி காட்டுவார்.


கனடா கூட்டமைப்பு உருவாக்கப்பட்டு, 150 ஆண்டுகள் முடிவடையும் நிலையில், பல்வேறு இன, மத மக்கள் வாழ சிறப்பான நாடாக உருவாகியுள்ளது. இந்நிலையை ஏற்படுத்தியதில் தமிழ் மக்களின் பங்கு மிகப்பெரியது. அதற்காக, அவர்களுக்கு நன்றி. கனடா அரசின் சார்பாக, ஒரு அமைதியான, ஆரோக்கியமான புத்தாண்டை கொண்டாட, தமிழர்களுக்கு வாழ்த்து தெரிவித்துக் கொள்கிறேன். இனிய தமிழ்ப்புத்தாண்டு வாழ்த்துகள்,’’ எனக் குறிப்பிட்டுள்ளார்.

பிரதமர் ட்ருடே, தமிழர்கள் உள்பட பல மொழி, இன மக்களுக்கு உகந்த நபராக செயல்பட்டு வருகிறார். ஏற்கனவே, தமிழர் திருநாளான பொங்கல் அன்று வாழ்த்துகள் கூறிய ஜஸ்டின் ட்ருடே, இனி வரும் வருடங்களில் ஜனவரி மாதம் (2017ம் ஆண்டு முதல்) கனடாவில் 'தமிழ் மரபுத் திங்கள்' என்று நாடு முழுவதும் கொண்டாடப்படும் என அறிவித்தார். இதற்கான, மசோதா கனடா பாராளுமன்றத்தில் நிறைவேற்றப்பட்டதும் குறிப்பிடத்தக்கது.

நன்றி -சமயம்

வகைப்படுத்தப்பட்ட பகுதி: கனடிய நிகழ்வுகள்.
கடைசியாக இற்றைப்படுத்தப்பட்ட திகதி: July 1, 2017